अत्तरिया : कैलालीको दमौरामा आजबाट श्रीमद्भागवत सप्ताह ज्ञान धन–धान्याञ्चल महायज्ञ सुरु भएको छ । गोदावरी नगरपालिका वडा नं. १० मा रहेको शिव मन्दिर तथा पर्यटन विकास समितिको आयोजनामा सोही मन्दिरमा आज (बुधबार) देखी महायज्ञ सुरु भएको हो ।
महायज्ञको एक कार्यक्रमका बिच सुदूरपश्चिम प्रदेशका मुख्यमन्त्री कमल बहादुर शाहले उद्घाटन गरेका छन । उद्घाटन पश्चात बोल्दै मुख्यमन्त्री शाहले समाजमा धर्म, संस्कृतिका बारेमा विभिन्न टिकाटिप्पणीहरु उठ्ने गरेको बताए । उनले धर्म, संस्कृति, परम्परा तथा रितिरिवाजलाई जोगाउनु सबैको प्रमुख दायित्व र कर्तव्य भएको बताए ।
उनले धर्म संस्कृतिको संरक्षणका साथै लागुऔषध लगायतका कुलतहरुबाट युवाहरुलाई बचाउन थालिएको अभियान सफल हुने कुरामा आफु विश्वस्त रहेको समेत बताए । उनले दुव्र्यसन, लागुऔषध कुतलमा पसेर दिनानुदिन युवाहरु विग्रदो अवस्थामा रहेको र त्यसको न्यूनिकरणका लागी प्रदेश सरकारले काम अघि बढाईसकेको समेत बताए ।
यस्तै कार्यक्रममा बोल्दै गोदावरी नगरपालिका वडा नं. १० का वडाध्यक्ष रविन्द्र शाही (गुड्डु) ले धर्म सस्कृतिको जगेर्ना गर्न तथा नयाँ पिडीलाई धर्म संस्कृतिको बारेमा जानकारी दिन महायज्ञको आयोजना गरिएको बताए । उनले धार्मिक महायज्ञले विकृति विसंगतीहरुको अन्त्य गर्नका लागी पनि मद्दत गर्ने बताए । वडाबासीका लागी महायज्ञ उत्सवको रुपमा रहेकाले यसको सफलताको लागी वडाकार्यालय विभिन्न तह र तप्काबाट सहयोग गर्ने प्रतिबद्धता व्यक्त गरे ।
कार्यक्रम उद्घाटन हनुअघि बिहान ८ बजे कलस यात्रा निकालिएको थियो । चैत्र १ देखि चैत्र ७ गते सम्म संचालन हुने महायज्ञमा ऋषिकेश उपाध्याय मुख्य कथावाचक रहेका छन भने प्रमोद पौडेल शास्त्री उप बाचकका रुपमा रहने आयोजकले जनाएको छ । महायज्ञबाट संकलन भएको रकमबाट मन्दिरको स्तरोन्नती संगै समितिको सभाहल निर्माण गरिने जनाइएको छ ।
महायज्ञमा दैनिक ५ देखि ७ सय जनाले कथाश्रवण गर्ने अपेक्षा आयोजकको रहेको छ । महायज्ञबाट २० लाख सम्म आर्थिक संकलन हुने अनुमान गरिएको छ । रमणिय क्षेत्रमा रहेको शिव मन्दिरमा आयोजना हुन लागेको महायज्ञले यस क्षेत्रको पर्यटन विकासमा पनि सहयोग पुग्ने अपेक्षा लिईएको छ ।
महायज्ञमा राष्ट्रिय स्तरका कलाकारहरुद्धारा संगितमय भजनकिर्तनका साथै देवलिला झाँकीहरु हुनेछन भने सन्त महात्माको अमृतमय प्रवचन प्रस्तुत गरिने आयोजकले जनाएको छ ।
